lundi 5 décembre 2011

الجامعة التونسية والبحث العلمي في عيون العالم

قرات في موقع كابيتاليس ان ترتيب الجامعات الذي تقوم به جامعة شانغهاي وضع اول جامعة تونسية في المرتبة 6719.

اتساءل في بعض الاحيان عن احساس كبارات البحث العلمي عندنا في تونس عندما يرون مثل هاته النتائج. ام انهم غير معنيين بها او على الاحرى لم يجدو الوقت الكافي للاطلاع على محتواها هل هم غيورون على مكانة الجامعةالتونسية في العالم ام انهم مشغولون. ولكن مشغولون بماذا هل بتدارك التاخير الملحوظ ام مشغولون فرض صيترتهم وجبروتهم وعقدهم على الطلبة والباحثين الشبان. نعم الباحثين الشبان الذين يرى معضم جهابذة البحث في تونس انهم يهددون مناصبهم عوضا ان يروا فيهم مواصلة المسيرة وتحسين سياسة البلاد في مجال البحث والتطور التكنولوجي. هل يعلم عضماء البحث في تونس ان بلدا لا يدخل في استراتيجيته الاهتمام بالبحث العلمي هو بلد يتجه الى الهاوية وفي احسن الحالات يتجه الى التبعية ام انهم منتفعون بهاته التبعية حتى يتمتعو ببعض التمويل واهم من ذلك البعض من تذاكر السفر.من المسؤول عن هذا الخراب. اقول ان احد الاسباب هو خنوع الباحثين الشبان وسكوتهم على التجاوزات خوفا او طمعا الله اعلم. ولكن ادعوهم للاستفاقة فالمستقبل والمسؤولية لهم وليس لما يسمون بال" المسامر المصدده"





يجب فتح ملف البحث العلمي والفساد المالي واستغلال النفوذ وان استمرينا في السكوت واللا مبالاة فالامر يتعلق باستقلال وسيادة تونس اذ ان السيادة ليست فقط في الجانب السياسي والاقتصادي فقط بل ايضا في برامج التعليم ومشاريع البحث العلمي. فمن ناحية اعتماد برامج تعليم خالية من روح وتاريخ وعقائد هذا الشعب تنتج جيلا بدون هوية ومن ناحية اخرى اعتماد مشاريع بحث لا تخدم البلد هو من قبيل مضيعة للوقت لا اكثر.





dimanche 5 juillet 2009

شهادة من التاريخ

هبط في جريدة الشروق اليوم الاحد مقال انا نراه خطير. يتمثل في شهادة تاريخية لما يقال انه اول حارس شخصي لبورقيبة. فكالعادة مؤسسة التميمي مشكورة على مثل هذا النوع من السيمينارات قامت باستدعاء شخص يدعى احمد من محمد بن مبارك بن نصير والمشهور (كعادة اي عضو في مشيليشيا) باسم احمد التليسي.
يحمل المقال عديد المعطيات الجديدة والخطيرة من نوع التصفيات التي حصلت بين المقاومين وايضا التصفيات التي كانت تحصل داخل الحزب نفسه وحكاية صباط الظلام.
انا استوقفتني هذه الحكاية خاصة وانه طباط الظلام كان معروف بالتعذيب وخاصة تصفية اليوسفيين. الشاهد قال الي ما صارت حتى عملية تصفية في هالبلاصة والي العمليات اقتصرت فقط على تعذيب.
اه.... هنا لازم نشكروه السيد على نزاهتو وصدقو بما انو هناك فرق شاسع ما بين التعذيب والقتل !!!!!!!!!!! غريب جدا ان نجد اناس يتحدثون بمثل هذه الرؤيا والغريب ايضا اننا مطالبون بتصديق كل ما يقوله هذا الشخص خاصة في نقطة انو صباط الظلام لم يشمل اغتيالات وتصفية مع العلم انو هذا الشاهد كان هو من المسؤوليين على مثل هذه "الافاريات" . يعني كيما ينجم نهار اخر لا قدر الله يجي واحد كان مدير سجن 9 افريل باش يتحفنا بخبر انو ماكانش هناك سجناء راي في ذلك السجن. صحيح الى جيلنا ماعاشش الفترة هاذي متاع صباط الظلام والحمد لله اما ما نحبش اشكون يستبلهنا.
في نفس الوقت مايلزمناش نستناو من السيد انو يقول "اي نعم راني قتلت" وفي سياق الشهادة متاعو قال حاجة مهمة جدا هي ان بن يوسف "من اكبر اخطائه انه واجه بورقيبة وفرنسا ما تزال في تونس وانه ارتمى في احضان القومية العربية.
كما تحدث ايضا على التنسيق المباشر والمتين بين الزعيم "كما يحلو للشاهد ان ينادي بورقيبة" والمخابرات الفرنسية والاقامة العامة والبوسطاجي كان البشير زرق العيون!!!!!!!!!!!! وقتها انا نتساءل هل تونس اخذت استقلالها بالفعل والا ...... ماعليناش
نخلي مؤرخينا يقراو المقال ويعملو تعليقاتهم الشخصية والعلمية.
هذا هو رابط المقال :
http://www.alchourouk.com/detailarticle.asp

lundi 29 juin 2009

Une civilisation vivante

J'ai voulu partager la vidéo suivante prise pendant la fête de la musique (Juin 2009), avec tous mes respects à cette civilisation qui a tellement soufferte et qui montre toujours qu'elle existe.

PS: désolé pour la qualité de l'image, vous saviez bien la résolution des Tel portable.

dimanche 22 mars 2009

مهرجان البرتقال... وينو ؟؟؟

قمت نهار عيد الشباب الصباح كيف العادة حليت نشوف في الاخبار لقيت تذكير بمهرجان البرتقال بمنزل بوزلفة الى ينتهي يوم 29 مارس هذا.
فرحت بصراحة خاصة وقت الى تذكرت كيفاش كل عام كنا نمشيو واحنا صغار مع الوالد نعملو دوره في المعرض متاع البرتقال. كان الواحد يشوف انواع واشكال: هذه مادالينا على شوية تومسون على المالطي والا الشامي حتى البرتقال الحلو ( انا ما نحبوش بصراحة), كنا نشريو الى بمقدورنا ونروح فرحا مسرورا.
شديت الثنية واندهت لمنزل بوزلفة عاصمة البرتقال. بعد ما فتت الزحمة متاع العادة في حمام الانف و بعد الجوجمة متاع سوق الشعبية وصلت لطريق سليمان قنطرة جديدة وشيخات. حاسيلو ما بطيناش في الثنية ووصلنا لمنزل بوزلفة... هانا نمشيو في الطويل نلوجو في المعرض بما انو نسينا وين موجود وقلنا بالكشي بدلولو بلاسطو ... لا حياة لمن تنادي.
خلينا السيارة وسط البلاد و بدينا ندورو ونسالوا: السلام عليكم بلاهي وين المعرض؟
امشي منا خويا.... مشينا وشي ما فما
برا من غادي شي زاده.
رجعنا وسط البلاد ووقفنا نستناو مانيش عارف فاش اما اهوكا نستناو. جانا سائق لواج شافنا نسالو على المعرض يضحك قال:
ياااااااااااااااااااا حسرا عالمعرض وينو ماو ماعادش فما معرض تحب البرتقال برا اهاوكا في الثنية تلقا النصب.
سالتو: اخي ما عادش يعملو معرض في المهرجان؟؟
اللواجيست: ماو عملو افتتاح النهار الاول وعملو المعرض النهار الثاني واكاهو. شبيه موش عاجبتك النصب في الكياس ماو كيما المعرض.
المرة هادي روحت موش فرحا مسرورا لاني ما شفتش انواع واشكال متاع برتقال الى يجيو حتى التوريست يشوفو ويتعرفو على منتوجاتنا.
ملاحظة: مبروك علينا جسر رادس.

vendredi 13 mars 2009

كِلبت لعباد

اش بيهم كلبو على زيارة للقيروان؟
زعما على خاتر حبو يمشيو غادي وما لقاوش بلاصا؟ ولا على خاطر حبو تكون الحمامات عاصمة الثقافة الاسلامية باش ينجمو يسهرو فيها اهوكا تولي حاجة وحويجة ؟

باهي سؤال اخر:

فرضا لو كان جا يزور تونس واحد من اسيادهم الي يخلص فيهم الله اعلم لواش كانو زعما يكلبو كيما توا؟؟؟؟
المهم يا بشر احترمو بعضكم خير.... وتونس ما عمرها ما كانت ملك للعلمانيين ولا للاسلاميين والا لغيرهم.

mardi 3 mars 2009

ملا عيب

نهار الاحد رادس حافلة سيارات تزمر هاذوما احمر واصفر ولخرين احمر وابيض. الناس الكل شايخين يغنيو, كل شويه تلقى مجموعة متاع جمهور هابطة من المحطة متاع القطارعاملين جو حتى هو نهار دربي والناس ما تستنى كان في هالنهار تقول ما عنا حتى شي باش نتلهاو بيه ... ما عليناش.
حاسيلو الجو هاذا الكل كانت حاجه بركة فيه موش قد قد الى هيه الموت متاع والدة مدرب النادي الافريقي عبد الحق بن شيخه المدرب الى جا من الشقيقة الجزائر باش يدرب في بلادو تونس. بالطبيعة نظرا للموقف قرر الوقوف دقيقة صمت ترحما على والدة بن شيخة. في اللحظة هاذي انا تصدمت بمشهد غريب على جمهور الترجي هاذا الفريق العريق بتاريخو والقابو. في الوقت الى الناس الكل واقفين دقيقة صمت, يجيو مجموعة تافهه ترفض احترام الاموات وتقوم تغني دون مبالاة.
هل هاذي هي اخلاق التوانسة ؟ من وقتاش ولينا قلال تربية للدرجة هاذي؟
فما شكون قالي : ت حتى النشيد الرسمي ما يحترموهوش؟ ممكن صحيح اما هذا موت يا عباد تيمكن كان قالولهم دقيقة صمت من اجل اطفال كوكب المريخ راو احترموه .... وهوني بما انو المسالة تخص واحد من فريق "" العدو """ لازم نقللو احترامنا.
والله كان عيب وانا واحد من الناس نتبرى منهم عالعباد هاذوم حتى ولو كانو من مشجعي الترجي...

samedi 14 février 2009

زيادات التعليم العالي

حظرت في اجتماع اقيم في دار الاتحاد يوم يوم السبت 31 جانفي حول الاتفاق الى وقع عليه اتحاد الشغل في ما يخص الزيادات بالنسبة لسلك التعليم العالي. الزيادات كيما شفنا الناس الكل مهزلة ودليل على استهتار كامل واحتقار كامل للجامعيين والباحثين. لقيت القاعة مليانه والناس الكل غاضبين وكشاكشهم طالعة نازلين على ممثل الاتحاد "المنصف الزاهي" نزله هي بيدها ما خلاو ما قالولو ودخلة بعضها ساعات ولا الحديث دون مستوى الجامعيين. لكن واحد لازم يفهم الى ماهي الا ردة فعل على خيانة صارة من ورا ظهرهم. التبريرات الى طلع بيها ممثل الاتحاد بطبيعة الحال ما قبلها حتى حد بل زادو فهمو الى تصرف الاتحاد و توقيعو "من غير علم الجامعيين او حتى الكاتب العام" كان مع سبق الاصرار والترصد.
من اهم النتائج الى باش خرج بيها هالزيادة تهم اكثر شيئ الشباب وبالاخص الطلبة, كيفاش؟
الطلبة في الوقت الحالي ما يهم كان قداش باش يخلص هذاكا علاش تلقاه يلوج في الاختصاص الى ماشي اكثر والا الاختصاص الى يخلص اكثر. تجي انتى تقلو الى كان تحب تولى استاذ في الجامعة وتعمل في البحث العلمي راك باش تخلص تقريبا كيفك كيف استاذ ثانوي "مع احترامي لاساتذة التعليم الثانوي". اكيد الطالب باش يقلك واش لزني انا نضيع وقتي في مرحلة ثالثة تقعد قداش من عام باش نخلص حاجه قليلة. اذا ما عادش الجامعي قدوة للطالب وحامل رسالة من انبل الرلس هي التعليم وعلى مستويات متقدمة.
المشكلة الاخرى هي الاستهتار الى لقيناه كجامعيين من طرف الاتحاد. من دون القطاعات الكل كان قطاع التعليم العالي الي يتم تجاوزي وعدم اخذ الراي متاعو. لواش هل لانو الاشخاص المخولين للدفاع علينا ماهمش يقومو بواجبهم؟ والا لانو كيف تقرر نقابة الجامعيين باش تعمل اضراب ما ينجهش؟ بطبيعة الحال الضعف الى فيه نقابة الجامعيين تخيل في موقف البهيم القصير.
شوفو مثلا نقابة التعليم الثانوي الى الاتحاد ياخذلها الف حساب في كل مفاوضات. ماو لانهم يدافعو بجدية على مصالحهم.
نرجع للاجتماع الى صار في دار الاتحاد الى كيما قلت حضر فيه ممثل الاتحاد وحضر فيه زاده الكاتب العام الى يقال انو ما فيبالوش بالتوقيع الى صار او بالاحرى ماشاوروهوش. كان غاضب نوعا ما وموقفو كان محرج بما انو ينجم يخسر مصداقيتو الراجل قدام الجامعيين الى اختاروه باش يدافع عليهم وهو وافق على هالمسؤولية. ممثل الاتحاد سمع الى ما يتسمعش حتى لين خرج يجري مالقاعة منرفز.
الكاتب العام لنقابة الجامعيين هذا قام بعد بتصريح في جريدة الموقف بتاريخ 6 فيفري وقال الى المشكل بين الجامعيين واتحاد الشغل هو عبارة على سوء تفاهم. انا كيف قريت هالملاحظة قلت هالسيد هاذا يفدلك. بعد الى صار الكل والاستهتار الكامل بالجامعيين من قبل اتحاد الشغل يجي كاتب عام الي من المفروض يدافع وحطوه في الموقع هذا باش يدافع على الجامعيين يقلل من الازمة الي صايرة. في الحالة هاذي انا نقول ما فما كان احتمال واحد وهو انو سامي العوادي متواطؤ منذ البداية وموافق على هالاتفاق الى وقعوه. ولذلك اقترح على الجامعيين انهم يعاملو هالسيد هذا كيف ما عاملو ممثل اتحاد الشغل يوم الاجتماع.
من نهارت هالاجتماع الى صار وبدات حملة كبيرة على مستوى الجامعيين للاستقالة ووقف الانخراط في الاتحاد كردة فعل للاحداث الاخيرة. فما حتى شكون اقترح نقابة مستقلة على الاتحاد وبرشا رجعو يحركو في هالاتجاه.
هل الحل هو الانسحاب من ساحة محمد علي والا المكوث للدفاع على استحقاقات وفضح المتواطئين؟ .....