قريت مؤخرا في جريدة الصباح مقال حول الطلبة التونسيين بفرنسا(هنا) ويقول المقال الي "اكثر من ثلث الطلبة لا يرغبون في العودة الى تونس" حسب احصائيات والى اخره .
المقال يقول زاده " الرضاء التام للطلبة التونسيين بفرنسا بنسبة 80 بالمائة، باعتبارهم تونسيين أولا، واعتزازهم بهوتهم الوطنية " اشنوة هالاعتزاز اللي يخلي الطالب ما يروحش يخدم في بلادو. الحكاية ما عاندها حتى علاقة بالاعتزاز بالهوية اما الحكاية هي اش باش يروح يعمل الدكتور في تونس؟
هل الظروف الى لقاها في فرنسا باش يلقاها في تونس؟ هل البشر الى كان يتعامل معاهم في فرنسا من تقنيين و مهندسين وجامعيين يلقى نفس العقلية متاعهم في جامعاتنا وكلياتنا ومراكز البحث في تونس؟ ما ننساوش الشهرية زادا بما انو المنحة الى كان ياخذ فيها معا شوية تدبير راس يساوي الشهرية المهزلة الى عند الجامعي في تونس ( حكاية الشهرية لازمها مقال وحدو ولا عدة مقالات).
انا رايي هو انو عدم رغبة عودة الطلبة التونسيين في الخارج ترجع الى المقارنة. والى هية بطبيعة الحال باش تكون مقارنة خارسة للجانب التونسي.